SUN微博：打橫嚟講

神鬼雙曾

今日，鬍鬚曾代表夕陽政府公布最後一份《財政預算案》，僅剩低五個月貨仔的看守政府，仲會有乜鬼願景吖？對佢哋有期許？傻o架咩？

鬍鬚曾早就放料吹風，話不會派錢，縱然佢手揸五百億盈餘，頂多只派糖仔作揞口費，例如退稅免差餉、代交電費及老人交通津貼等有益大財團的善行。

眾所周知，鬍鬚曾和煲呔兩人話就話係好兄弟，查實，鬍鬚曾只係做「」咋，乜都係煲呔曾話晒事，連舊車的「施政報告」，老早講定「財政預算」啦！今日，鬍鬚曾只不過站在台前跑龍套，作吓狀，扮影帝，豬噏一通而已！

不過，大家亦毋須閉翳心噏，因此廢柴政府，每每唔見棺材唔流淚，好似上次鬍鬚曾咪話用了半年諮詢過市民唔使派錢嘅！點知，引起公憤後，兩日不到，便死死氣宣布全港每人派錢六千大元，所以，我哋仲係有為自己權益發聲嘅機會嘅！

煲呔曾希望自己在任時，歐債危機又來一鑊，等佢有得表演喎！世上邊有咁超黑心嘅人㗎？嗱！遠的不說，今日香港財政個鑊，隨時會爆，睇吓這對神鬼兩兄弟，點搞……

彭志銘

次文化考古學家，對城中潮語有深入研究，文字抵死幽默，博徵博引，廢官廢人行埋一邊。