政壇：趙國雄忌諱一本萬利
香港人過年撞口撞面都會大講好意頭說話，置富產業信託主席趙國雄就話，雖然有啲說話意頭唔錯，但都要小心講，譬如最好唔好講「一本萬利」喇，費事令人聯想起「乜乜」霸權喎。
佢尋日相約一班老友飯局，一向搞鬼嘅佢即興咁拎起用嚟裝飾嘅獅頭，同CEO洪明發舞獅，順便搞吓氣氛。講起動物，佢透露早喺幾年前，佢因為成日出差去杜拜，就喺當地買咗一隻鷹同一隻鵰，寄養咗喺當地訓練鷹同鵰嘅學校入面，有時唔使出差都會抽時間去杜拜探吓佢哋。一養就養咗成三年，仲學埋點樣用手勢、口哨去發出指令，可惜後尾當地爆發禽流感，禽鳥都被毀滅，佢嘅寵物都冇咗囉。
