香港總商會總裁袁莎妮（Shirley）尋日出席中總新春酒會，見到新民黨主席葉劉淑儀，即刻收到葉太封利是，唔講唔知，佢哋曾經係上司下屬關係，雖然Shirley收到利是時都有啲唔好意思，但未婚人士收利是，唔使怕醜喎！
葉太話，Shirley九一年加入政府做AO（政務官）時就跟佢做嘢，當年佢係副行政署長，見到舊下屬咪主動派利是。葉太之前同總商會主席胡定旭會面時，曾講過想去總商會講吓反對競爭法嘅建議，尋日Shirley透露已經安排緊喇。
葉劉淑儀出席中總新春酒會，衣着雍容華貴。
葉劉淑儀（右）一見前下屬袁莎妮，即時派利是。
