政壇：學者余永賢想選特首
特首選舉時有意外玩家，尋日再多一名曾任新加坡大學研究員的學者表示有意參選，該學者名叫余永賢，尋日已將履歷同政綱發畀傳媒，仲訂於明日喺中環四季酒店舉行記者會添。余嗰份資料印有其競選辦公室嘅標誌，似乎唔係玩o架。
余永賢提供嘅簡歷顯示，佢係香港應用科技研究院顧問，曾經喺德國比勒菲爾德大學做教授，亦做過澳門大學校長高級顧問及澳門歐洲研究學會董事，又曾做過新加坡國立大學東亞研究所高級研究員，以及香港發展局助理總經濟師。
佢強調，特首必須帶領香港邁向知識型社會，仲提出「科教興港」嘅論述，認為應倍增教學資源及大學學額等。雖然未知余永賢背後有冇星光熠熠嘅支持者，但從佢提出嘅十七項治港政綱嚟睇，一啲都唔輸蝕！