政壇：教院正名張炳良報喜？
新一年有新希望，香港教育學院校長張炳良尋日就喺新正頭講新希望，不過，講到教院正名做大學，佢嘅說話卻係老調重彈，「教院正名大學指日可待喇！」
呢句話，佢唔係第一次講，○七年起教院就開始爭取正名做大學，校友、師生等到頸都長，依然只聞樓梯響，張炳良尋日就話，過去幾年教院喺教學同研究上大有進步，正名只係爭咁個程序，相信好快就會有好消息喎。
佢今次到底係炮製另一個「狼來了」，定係收到風，預早宣告好消息呢？教院師生梗係希望係後者。
張炳良仲有一年就任期屆滿，記者問佢做校長或做教育局局長邊個位對正名有利啲，佢就點都唔肯表態，話唔想引起遐想喎，唔係話好快有好消息㗎咩？官場動向六月底就有結果喇，唔通正名嘅事遲過呢個日子？