政壇：搞搞政：大懶蟲拖累議員加薪

新正頭打工仔都希望加人工，立法會議員都唔例外，尋日立法會議員酬金及工作開支償還款額小組委員會開會，白鴿黨張文光力撐要加議員人工至局長人工嘅四至五成，工黨主席李卓人都忍唔住呻，議員人工仲低過中學校長同老師。不過，佢哋嘅加薪要求係月薪由七萬多元彈跳到十四萬蚊喎，即係加薪一倍，過唔過到大眾嗰關呀？

日返四小時 兼職都不如

其實每屆立法會尾聲，秘書處都會檢討議員人工，如有調整就交由政府嘅獨立委員會考慮。早前秘書處調查過其中三十八位議員嘅工作量，發現平均每人每周返工五十九個小時，有啲工作狂議員每周返工一百小時添，但亦有人只係返咗二十小時，即係一日返四小時，連兼職都不如。

呢個就係現實，有啲議員做死、有啲大懶蟲如金融界李國寶、「體育、演藝、文化及出版界」霍震霆、鄉議局主席劉皇發及中總代表黃宜弘，就成日被指開會出席率低，難怪張文光講講吓都好㷫，忍唔住話有乜理由要佢幫啲成日唔開會、返唔足工、又唔將議員視為全職工作嘅議員爭取加人工吖？其實，有啲一係唔開會、一開會就瞓覺嘅議員想加人工，都要對得住納稅人至得o架！