政壇：雷添良話買靚酒好過置業
龍年股市開紅盤，但樓市靜英英，尋日九巴後人兼羅兵咸永道會計師事務所合夥人雷添良（Tim）出席中華總商會喺君悅酒店搞嘅團拜時，都講到龍年投資，佢話本港經濟凶險，樓市將下調百分之十至十五，但依家未係買樓嘅好時機，佢就投資靚酒。
中總副會長、協成行董事總經理方文雄都話，政府復建居屋對樓價有一定衝擊，要置業嘅市民唔使太心急喎。歐債危機下，歐美各國繼續印銀紙救市，佢認為銀紙一定貶值，買金反而穩陣啲。煲呔曾尋日繼續為中總團拜擔任主禮嘉賓，唔知係咪佢就快「退伍」，入場時已冇人拍掌歡迎佢。
