政壇：師生逼宮趙心樹龜縮

浸會大學嘅民調風暴發生至今已經半個多月，焦點人物兼浸大傳理學院院長趙心樹一直採迴避態度，一個堂堂大學學院院長竟然懼怕拆彈，尋日炸彈引爆咗第一波，約八百個浸大師生聯署登報要求校方暫停佢嘅院長職務，大專院校竟然出現咁大規模嘅逼宮事件，足令全城關注。點知當事人趙心樹繼續龜縮，成日都冇回應事件，仲早有預謀請一個禮拜假匿埋添，睇嚟，浸大師生要出「尋樹啟事」至得囉！

忽然放多一個禮拜假

呢次事件由一個唔完整嘅民意調查被提前公開引起，不過公眾關注嘅卻係事件背後有乜含意，尤其打着大學名堂進行嘅民意調查被不完整地披露後，造成民意對其中一個特首參選人形勢嘅錯誤判斷及傾斜，呢個被刻意導致嘅假象係咪涉及大學中人充當政治推手？甚至帶有更深一層的政治介入？遺憾嘅係，事發以來趙心樹一直不敢正面回應事件。

更搞笑嘅係，佢喺浸大新年長假期結束後又放多一個禮拜假，請假時間啱啱比浸大師生逼宮行動早一日，佢請假嘅消息由浸大副校長陸大章，前日下晝三點幾向師生發出電郵通知，只係話趙心樹由三十日起放年假到二月六日，院長職務由副院長馬成龍暫代，但無交代趙心樹請假嘅原因。

浸大師生聯署行動都逼得校方要回應，發言人話，大學了解各校友及師生對事件嘅關注，會嚴肅處理，但校方未有就暫停趙心樹職務、及喺調查民調事件嘅小組加入學生代表嘅訴求作出回應。不過，近八百師生嘅逼宮行動絕唔會靜悄悄落幕，六號之後，趙心樹始終都要面對師生同公眾啫！佢身為傳理學院院長，竟然同教學生嘅一套背道而馳，事件嘅發展真係幾諷刺。