唔怕天氣冷酷 最怕官府涼薄

香港啱啱經歷咗十六年來最凍嘅農曆新年，新春假期最忙碌嘅除咗零售商販，仲有為長者提供平安鐘服務嘅機構，日日都收到幾百甚至逾千宗求助個案。最悽慘嘅係，嚴寒天氣之下，幾乎日日都有人凍死，淨係年初三赤口，就有七名長者及長期病患者猝死，簡直係香港嘅恥辱。

其實，類似情況年年發生，歲歲如是，凍死人早就唔係乜嘢新聞，尤其係無依無靠嘅「隱形長者」，叫天不應，叫地不靈，死咗都冇人知。講嚟講去皆因港府涼薄，對長者不聞不問。即係咁，隨着本港人口愈來愈老化，老人問題愈來愈嚴重，港府口惠實不至，講多過做，搞到老無所依、老無所養嘅長者愈來愈多，有乜法子唔凍死吖，叮！

迫於各界強烈要求改善安老服務嘅呼聲，港府先至話推出「長者社區照顧服務券計劃」，但仲要等多兩年至可望實行。唉，你估個個老人家都可以慢慢等咩！老實講吖，就算等得到，呢個計劃究竟可唔可以真正幫到老人家，都要睇過至知。業內人士提醒當局，要嚴格監察計劃運作以確保服務質素，至於服務券嘅金額就唔應該少過現時同類服務。

冇錯嘞，安老服務嘅目的就係令老人家可以安心養老，三餐無憂，病有所醫，而唔係做埋啲門面工夫，小恩小惠，買鹽唔鹹，買糖唔甜。所謂長者社區照顧服務券計劃，美其名曰鼓勵居家養老，資助長者聘請家居服務員上門照顧起居生活，但不可不知，家陣護理、送飯、陪診呢類社區照顧服務嚴重供不應求，當局喺培訓人手、監管等方面又遠遠跟唔上，呢啲問題唔先解決，講乜都冇用。

再講吖，今時今日物價飛漲，每月區區二千蚊服務券可以得到乜嘢服務，畫公仔唔使畫出腸嘞啩。嗱，咪話太一叮踢爆，當局鼓勵居家養老，話就話為咗縮減輪候政府安老宿位嘅人龍，其實係為當局安老不力補鑊，將養老責任推畀社會嘅咋。

所以話，唔怕天氣冷，最怕人心冷，港府涼薄，同老人家斤斤計較，令香港淪為冷漠嘅社會，咁唔止係老人家嘅不幸，而係所有香港人嘅不幸。係人都知，要徹底解決安老問題，最好嘅辦法就係推行全民退休保障制度，港府推三推四，連研究都唔肯，所謂安老，根本就係大隻講，叮！