政壇：搓胸勤做黃成智英文老師
立法會新界東議員陳克勤喺○八年當選後一句「Try our breast」，一「乳」驚人，不但成為市民茶餘飯後嘅話題，仲被嘲為「搓胸勤」添。而最近同區嘅白鴿黨議員黃成智開記者會，講英文時口窒窒，事後就被網民嘲笑佢講「雞腸」（英文）差過小學雞。
會後受訪免出醜
問「過來人」克勤仔有乜意見？佢好厚道冇落井下石，反而視成智為同路人，鼓勵成智加把勁，之後仲疑似傳授幾招個人心得畀佢參考添！
克勤仔話依家出席記者會前會因應發言重點，諗定幾句簡單英文以便有需要時可以即時運用，當面對有時未能將中文發言轉成英文時，佢亦有秘訣教成智，就係直接要求喺記者會後分開做訪問喎！未知同是天涯淪落人嘅成智會唔會參詳下克勤仔嘅招數，避免下次再出醜呢？
其實，克勤仔都知衰，近年努力研習英文，依家反充當老師教番成智轉頭，聽落得啖笑。
