清拆劏房變迫遷 誰憐蟻民失居所

新春佳節，喜氣洋洋，可惜有人快樂有人愁，對於劏房住戶來講，新年反而可能係最難堪嘅時候。呢，港府下令清拆違規劏房，居民隨時流離失所，一批大角咀工廈劏房住戶日前新年流流上街請願，要求當局先安置，後清拆，正正反映劏房住戶嘅徬徨與淒涼。

事緣港府打響取締違規劏房第一炮，下令清拆大角咀一幢工廈劏房，通知書舊年十二月先至發出，但要求居民三月七日前就要搬走，而且又冇安置，又冇配套措施，簡直不近人情。試諗吓，當局失驚無神，話拆就拆，居民一時之間頓失居所，唔嬲就假！

正如居民話齋，當局以安全理由清拆違規劏房，本來無可厚非，但安排太過倉卒，根本唔夠時間搵地方搬；亦有居民反映，現時以月租一千五百元租住工廈劏房，冇能力負擔私人樓宇租金，當局只係用二千幾元搬遷津貼打發居民，同逼人瞓街冇乜分別。話時話，呢批劏房居民嘅要求其實唔係好高，只係希望當局體恤民情，先安置，後清拆，就算唔可以即時分配公屋，亦應該安排受影響居民到中轉屋暫住，冇理由叫人哋露宿街頭啩！

冇錯嘞，法律不外乎人情，當局要清拆違規劏房，冇人會反對，但都應該為嗰啲冇地方棲身嘅居民着想o架。其實，自從港府發出清拆令以來，劏房居民徬徨無助，怨聲載道，已經多次發起抗議行動，包括到屋宇署門外紮營請願。當時，屋宇署口口聲聲話唔會令市民因部門執法而無家可歸，但到今日仍未有任何實際安排，你話係咪老點吖？唉，取締違規劏房第一炮已經搞到一鑊泡，再咁落去，都唔知會搞出乜嘢大頭佛！

講真吖，違規劏房氾濫成災，根本就係當局一手造成。由於港府房屋政策失當，樓價高企，公屋供應又唔夠，唔少基層市民負擔唔起私樓租金，惟有退而求其次住劏房。所以呢，港府一日無法滿足基層市民住屋需要，劏房問題就永遠都無法解決，拆咗一個，仲有千千個，野火燒不盡，春風吹又生吖！

講到底，朱門酒肉臭，路有凍死骨，港府高官住豪宅，飲紅酒，又點可能理解劏房居民嘅苦況吖。外國傳媒將香港「籠民」形容為「籠狗」，無疑係一種侮辱，其實嚴格嚟講，係港府嘅恥辱就真，叮！