政壇:東鐵大學站易名中大站?

港鐵西港島線將喺香港大學設新車站,但依家中文大學旁邊已經有個「大學站」,令坊間一度出現「大學站」鬧雙胞爭論。有網民好細心咁發現,港鐵最近提交畀立法會嘅未來港鐵網絡圖入面,將依家東鐵線「大學站」改名叫「中大站」,另一邊西港島線就叫「港大站」。不過,記者之後向港鐵求證,港鐵話係手民之誤打錯咗,暫時兩個車站站名未有最終定案。

港鐵公關話幅圖入面見到中大同港大都係打錯,依家暫時正確嘅站名,係大學站同香港大學站,但始終未有最終定案,要待西港島線二○一四年通車時至有最終定名。

的確,兩間大學一度爭住叫做大學站,中大人爭大學站理據係先到先得,認為冇理由畀港大遲嚟先上岸;但港大人就話港大有百年歷史,中大成立只不過得四十幾年,論資排輩都唔應該要港大讓路畀佢。港大同中大爭住要大學站個名,所以兩方面都有人(目及)實港鐵嘅一舉一動,費事個名定咗喊都無謂。

第一手消息請下載on.cc東方互動iPhone/iPad/Android Apps
「Money18免費即秒股票報價網站」現推出8升級功能,財經資訊,實時實發!