政壇：台灣同鄉馬會食開年飯
沙田馬場尋日人頭湧湧，喺香港定居逾三十年嘅港澳台灣同鄉會會長賴李承美，中午同家人及留港度歲嘅台灣駐港機構台北貿易中心總經理劉錫威夫婦，喺度食開年飯，同枱嘅仲有賴太老公、前港澳台灣同鄉會會長賴建成、大女賴明潔同女婿譚錡鋒。
賴太係同鄉會成立二十幾年嚟首位女會長，佢話嚟緊三月同鄉會將舉行春茗同就職典禮，佢搵緊台灣原住民青年來港表演。此舉既可畀故鄉年輕人出外體驗，又可慰藉旅港鄉親。
劉錫威就話調派來港五年，已過慣港式新年，今年囝囝由上海返港度歲，囡囡仲喺香港讀大學，一家四口喺香港度歲，別有一番滋味。
賴建成夫婦（前中及左）同劉錫威夫婦（右前及右後）齊食溫馨開年飯，譚錡鋒同賴明潔夫婦（後左、中）亦嚟同樂。