政壇:車公靈籤批中 白鴿政改撞板

俗語話「好嘅唔靈醜嘅靈」,有啲嘢真係唔到你唔信。香港電台舊年幫五大政黨求籤,今年睇番,發現準確度好高。

白鴿黨得到第六十九籤中籤,籤文係「真似假時假似真,弄假成真那曉因」,籤斷「糊里糊塗、認賊作父、沉香當柴、非醒不可」,講中白鴿黨舊年政改一役妥協後,一直為人詬病佢哋仲係咪泛民主派。車公嘅批文話白鴿黨係「世人難識真和假,真假如何兩不分」。嘩!又幾準喎!

當時白鴿黨一行入中聯辦商討政改,以為自己幫緊香港人,點知出嚟後畀市民鬧到狗血淋頭,如果白鴿黨認真對待籤文,唔知當日仲敢唔敢行入中聯辦呢?

又批中社民連進退不得

社民連舊年由內鬥不斷,到最終分家,只得長毛一個頂住。咁啱車公批佢哋係第七十八籤下籤,四句籤文係「尋春子弟過江山,進退不得半道難;峰高海闊崎嶇阻,望斷江河未得還」,其中「進退不得半道難」同佢哋現況可以話係不謀而合。

建仔係第二十一籤中籤,籤文話「頃畝之田歲月深,祖宗創積到於今」,即係話建仔食老本,要靠祖宗「祖蔭」,睇番建仔今年區議會大勝,成績的確唔錯,但好大原因都係靠以往做落嘅工夫為主。

得到第十九籤中籤嘅富貴黨,籤文係「朱門雖富不如貧,取得黃金卻損財;但體石崇多積玉,可曾買得少年人」,解作「貪心不可、家宅小吉、婚姻不合」,批中佢哋區選力保山頂區,但同經濟動力合作仍然貌合神離。至於公文袋,只係批中佢哋訴訟勝算大,其他如出入平安、氣勢如虹等,就唔係太準嘞。

第一手消息請下載on.cc東方互動iPhone/iPad/Android Apps
「Money18免費即秒股票報價網站」現推出8升級功能,財經資訊,實時實發!

設計圖片及對白