加風勁吹民生苦 該出手時就出手

新春流流,繼續恭喜發財,繼續龍馬精神,繼續走親訪友。不過咁,今日係大年初三赤口,易生口角是非,不宜拜年,不如去車公廟轉風車,祈盼轉來好運,或者去黃大仙祠許個靚願,希望心想事成。對打工仔來講,新年願望一係家庭和睦,二係身體健康,三係加人工。

話時話,通脹高企乜都加,就係人工冇乜加,打工仔好難頂啫。官老爺話過,通脹有望喺去年底見頂,正一呃鬼食豆腐,過咗年嘞,通脹仲未有回軟嘅迹象。好似尋日年初二咁,一家人坐埋食餐開年飯,樣樣餸菜起晒價,小數怕長計o架。呢,本報記者去九龍城街市走一轉,好似寓意生財嘅生菜,由六蚊斤賣到十蚊斤,漲價六成幾;其餘蔬菜亦通通起價,有啲仲貴咗五成添,都咪話唔得人驚。

開年飯唔少得嘅海味,價格亦較去年上升一至兩成,仲未見頂添。有海味店老闆娘話,內地旅客消費力強勁,帶動生意額上升,但港元貶值,成本上漲,好似花膠、鮑魚咁,來貨價升咗兩成,仲未完全喺零售價反映,估計過埋年,零售價要再上調一成喎。

加價嘅何止應節食品,新年伊始,電費加,交通費加,連快餐都要加。有啲食店仲出蠱惑招,將飲品與食品分開計價,實際加幅逾一成;有啲將百分之十嘅服務費,加至百分之十二。對於加風勁吹,港府束手無策,唔係話商業決定,就係耍嘴皮勸喻商家要講社會責任。鬼咩,港鐵連年加價,根據乜鬼可加可減機制,今年又有機會加價,作為港鐵大股東嘅港府帶頭搶錢,點有說服力吖。

所以話,港府冇嘢叻,最叻斂財。有會計師行估計,受到賣地收入增加帶動,加埋利得稅同薪俸稅收入都高於預期,本年度庫房唔係預期嘅虧損八十多億元,而係盈餘超過五百億。喂,咁多錢,都係民脂民膏,取之於民,用之於民,尤其係龍年通脹逼人,港府係咪好應該用嚟扶貧紓困先?

啦啦啦,鳥之將死,其鳴亦哀;人之將走,其言亦善。財爺鬍鬚曾話喎,正忙於為已成形嘅預算案作最後修飾,希望初十發表時可以為市民帶來「新春祥兆」。一言既出,駟馬難追,希望鬍鬚曾呢次唔好再齋噏,派錢又好,退稅又好,扶貧又好,紓困又好,點都要做啲嘢o架啦。

一句到尾,通脹高企民生苦,該出手時就出手,港府千祈唔好再做守財奴吖,叮!

第一手消息請下載on.cc東方互動iPhone / iPad / Android Apps
Money18免費即秒股票報價網站現推出8升級功能,財經資訊,實時實發!