檢討淫審假諮詢 親疏有別真荒謬

香港有冇淫審制度？呢個問題如果考通識，睇怕多數學生會肥佬。話冇咩，淫審處及影視處打正招牌，冠冕堂皇；話有咩，淫審制度千瘡百孔，淫賤傳媒橫行無忌，呢條題真係唔知點答！

正因為淫審制度千瘡百孔，亂七八糟，要求檢討及改革嘅呼聲一浪高過一浪，所以咯喎，當局焗住喺○九年搞咗一輪公眾諮詢，眨吓眼過咗兩年幾，究竟有冇結論呢？結論唔係冇，可惜講出嚟得啖笑。

當局話喎，為咗增加淫審處代表性，打算將審裁員由原本三百四十人增至五百人，委任期則延長至九年，但係對司法機構要求淫審處行政同司法分家嘅建議，就一口拒絕，你話係咪捨本逐末吖。

正如立法會議員批評，以為增加審裁員就可以增加代表性，概念大錯特錯，港府應該做嘅係，訂出有效案例同標準，加強審理準則，並且要提高淫審處執行嘅有效性。學者宋立功更加一語中的，直斥影視處執法手軟，淫審處評審緩慢，檢討又毫無進展，增加審裁員數目完全無助解決問題。

冇錯嘞，增加人手同有效執法根本係兩回事，你估依家係擔沙填海，人多好辦事咩。講嚟講去，最大問題就係淫審處一身兼行政同司法兩職，唔先解決呢個問題，所謂檢討及諮詢，統統都係假嘅。港府拖拖拉拉，整色整水，無非都係採取拖字訣，愚弄市民啫。

係人都知，淫審處及影視處親疏有別，早就淪為包庇淫賤傳媒、打壓正義傳媒嘅政治工具，有人話佢哋之所以對宣淫販賤嘅壹淫媒網開一面，係怕告錯人，咁就真係太傻太天真咯，查實呢班港英餘孽同淫媒根本係自己友，護淫唯恐不及，點會真心改革吖。

講到親疏有別，最經典嘅惡例莫過於Kelly Brook事件，同一輯外國女星性感照，《東方日報》及《太陽報》一刊登就被評為二級不雅，爛果報同日刊登則被評為一級非不雅，而香港有售嘅外國雜誌《NOW》冇遮冇掩，連送檢都慳番添。同一天空下，竟然有三種標準，如果話淫審處及影視處唔係選擇性針對東方報業，你信唔信吖？更離譜嘅係，當局甚至連刊登於《東方日報》及《太陽報》嘅廣告都唔放過，諸多挑剔，刻意檢控，簡直無所不用其極。

相反，當局對淫賤黎就百般縱容，就算壹淫媒旗下刊物違反《淫褻及不雅物品管制條例》過百次，次次都獲輕輕放過。仲有吖，獻世短短幾個月嘅免費報《爽報》已累積二十三宗發放不雅物品個案，搞到天怒人怨，但到依家仍未受到任何懲罰。老實講，如果唔係自己友，壹淫媒可能早就被罰到破產啦。

話到尾，當局檢討淫審制度，根本係掩人耳目，做戲咁做。計太一叮話齋，餘孽淫媒沆瀣一氣，香港只會繼續烏煙瘴氣嘅咋，叮！