政壇：搞搞政：孖曾孫公衰運一條龍

香港術數家協會術數師楊子東預測香港龍年運情只屬表面風光，至於高官運勢方面，師傅批完煲呔曾同「親兄弟」財爺鬍鬚曾嘅八字後，話煲呔曾會喺農曆三月精神恍惚、易出錯，即係話臨執包袱前都可能會搞鑊大大鑊嘅，就算離任後嘅農曆九月，亦可能會同太太爆爭拗，而鬍鬚曾嘅命格行土運，發展不大，意味留任下屆政府嘅機會不高，仲話佢喺農曆五月要特別注意身體健康。

除咗孖曾外，好多市民都關心患有腎病、之前又感染退伍軍人症痊愈嘅教育局局長孫明揚嘅龍年運勢。楊師傅舊年初貼中孫公喺兔年健康不濟，結果好嘅唔靈醜嘅靈，全部中晒，搞到個心都唔好過，所以佢批算孫公龍年運程後，就好隱晦話：「（孫公）洩氣太重，理應下台，五月健康差。」再追問，佢先肯講：「佢本身身體已經好差，嚟緊要退落嚟，可以頤養天年已經好好。」

明白晒，新年流流，總之希望大家身體健康啦。