政壇：煲呔曾行花市患「蕉」慮症

正所謂「一朝被蛇咬，十年怕草繩」，曾經幾次畀議員掟蕉鬧爆嘅煲呔曾，唔知係咪畀蕉嚇得多，依家聞蕉色變。

話說尋日係煲呔曾任內最後一次行年宵花巿，但都行得鬼祟過人，朝早九點半鐘忽然通知傳媒，話兩粒鐘後去行元朗年宵市場，都唔知係咪想避開啲示威，怕被衝擊。

大學生推銷公仔都驚

佢同老婆喺花市行咗一陣，可能因為前日出席答問大會係咁咳搞到連議員提問都聽唔到，甩晒轆所以佢行到買年貨嘅攤檔，望住花生糖心思思，但又唔敢試。咁梗係，若果嗒咗花生糖，黐牙又封喉，跟住咳唔停，連記者嘅提問都答唔到，就更樣衰喇！

行行吓，有個後生仔突然向煲呔曾出「蕉」，煲呔曾當堂打咗個突，露出錯愕表情，佢身邊嘅保安隨即如臨大敵，將個後生仔當示威者咁隔開，其實個後生仔只係諗住出「蕉」推銷布公仔啫，唔使咁驚吖嘛！

嗰位後生仔姓黎，係嶺南大學三年級學生，強調自己毫無惡意，可惜被保安隔開咗，佢質疑煲呔曾行花市係咪真係睇到年宵嘅情況，表現差強人意。佢仲批評：「佢（煲呔曾）話刺激港人生育，但雙非孕婦問題一直都未解決，即係唔係鼓勵生育啦！」

最後煲呔曾兩公婆總共花咗一千蚊當交貨，離開時，有記者就問佢截「雙非」四招治標不治本，佢就即刻講聲拜拜轉身走人。老實講，如果佢唔係心中有鬼兼怕有人再出「蕉」，十足患咗「蕉」慮症咁，又使乜走得咁快呀！