赤柱廣場發水 領匯博得就博

發水樓聽得多，發水廣場大家聽過未？未聽過係正常o架，因為法律唔容許，正常情況根本唔會發生，除非……業主係目無法紀嘅大惡爺，而監管部門又撞正係一班眼盲耳聾嘅官老爺，咁就另當別論。哈，撞鬼佢吖，咁荒謬嘅情節，居然真係發生咗喎！

嗱，太一叮講緊嘅，係領匯旗下嘅赤柱廣場發水醜聞。領匯一向醜聞多多，瘋狂加租趕絕小商販啦，縱容外判商剝削員工啦，對屋邨設施管理不善啦……真係是非不絕，令人眼花繚亂，所以，如果大家一時記唔起赤柱廣場單嘢，一啲都唔奇。不如咁啦，等太一叮同大家重溫一次啦。

本報月初率先踢爆，領匯藉翻新工程，居然未經地政總署同意，擅自擴建赤柱廣場牟利，令廣場商業面積比地契列明嘅多出超過兩成，發水面積達二千三百幾平方米，測量界估計市值達六億元。若然領匯偷雞得米，咁就肥過肥仔水咯！

當然啦，天網恢恢，疏而不漏，發水廣場醜聞曝光之後，領匯隨即一身蟻。立法會議員誓要窮追猛打，南區區議會又話要開會跟進，連審計署都表明要立案調查。就喺呢個敏感時刻，離奇嘞，領匯嘅項目及發展總監謝少祥突然宣布劈炮，仲係即日離職，走都走唔切。

嗱嗱嗱，赤柱廣場違規擴建證據確鑿，領匯面臨公審前夕，負責物業發展嘅要員離奇辭職，正常人都估到發生乜嘢事啦。立法會議員係咁講嘅，事件或涉及領匯要搵人祭旗，死無對證，港府絕對唔可以就咁算數，一定要查個水落石出，加以嚴懲！

冇錯喇，廣場偷雞發水有損公眾利益，如果容許目無法紀嘅惡爺業主側側膊過骨，即係姑息養奸，以後容乜易變成周街發水商場、發水戲院、發水寫字樓o架？咁仲成世界嘅？到時唔使等庸才做特首，香港已經天下大亂咯。

講開又講吖，領匯違規早有前科，之前違例出租屋邨車位，最終只係賠錢了事，今次你估唔係睇死港府跛腳軟弱，所以夠膽目無王法到搞發水廣場咩？監管部門縱容吖嘛，違規財閥咪有恃無恐，變本加厲囉！

即係咁，赤柱廣場違規發水，監管官僚要傳媒揭發先至如夢初醒，已經係失職，若然一錯再錯，再次輕縱積犯，咁你哋想唔認係尸位素餐嘅「發水官僚」都唔得咯，叮！