城中一連兩日舉辦亞洲金融論壇（AFF），大批財金猛人聚首，日講夜講人民幣，尋日下晝輪到恒生銀行副董事長兼行政總裁梁高美懿，同首次以貝萊德亞太區主席名銜亮相嘅馬凱博登場，佢哋兩個不約而同攞悶場嚟講笑。
梁高美懿係論壇下晝場嘅講者，佢話聽咗成日相信大家應該聽到死咁滯，淹沒喺人民幣之中，輕輕挖苦之後，佢都拿拿聲開講；到馬凱博登場時，現場氣氛又歸沉悶，佢話自己係當日最後一個人民幣講者，意思係大家忍耐多陣、就捱完喇。
馬凱博首次以貝萊德亞太區主席名銜登場。
論壇長氣，梁高美懿都要自我挖苦搞氣氛。
