政壇：搞搞政：施榮懷失足有神庇佑
廠商會早排換莊，施榮懷（Irons）榮任會長，履新之後，佢親自到多個廟宇還神，去到筲箕灣譚公廟時卻不幸遇意外，唔小心踢到咕o臣失咗平衡，成個人仲趴咗喺地，眼鏡飛脫，不過，拜得神多自有神庇佑，佢受傷之後，撞啱附近有幾個救傷隊嘅人即時提供幫助，真係不幸中嘅大幸。
施榮懷事後亦有去醫院照X光檢查，證實冇乜大礙。講起今次意外，佢透露今次唔係佢第一次整親手腳，細個時，佢曾經同人喺飯枱打乒乓波時，隻手傷到骨都插咗出嚟，當時佢即刻扭番正啲骨，真係少年膽大。
新春將至，佢好應景咁同大家拜個早年，原來佢同屋企人、約莫二十人打算到泰國曼谷旅遊，但最近曼谷盛傳會遭受恐襲，所以為安全起見都決定取消行程，改到澳門玩番三日兩夜就算，一家人去邊度玩都咁開心嘞！
