政壇：豬狼鬥獸棋年宵熱賣
維園年宵尋日開幕，唔少政黨都有擺檔賣嘢籌款，特首選舉更成為年宵產品其中一個主題，我哋就發現一檔名為「龍頭大哥」嘅攤檔，設計咗一副「豬狼鬥獸棋」，裏邊有唔少用大家熟口熟面政界中人為對象嘅鬥獸棋新角色，大家可以對號入座o架！
設計呢副棋嘅沈先生話，因為特首選戰愈來愈激烈，所以佢有感而發將兩位「狼豬」參選人加入鬥獸棋，一來教育吓啲年輕人，二來畀人緬懷吓鬥獸棋呢個經典遊戲。除咗豬同狼外，沈先生話老鼠嘅角色早就諗定由專業會議立法會議員梁美芬擔任。梗係啦，梁美芬有名你叫「鼠王芬」嘛。
