政壇：人民力量杯葛壹傳媒

去台灣觀選爆出毆打疑雲嘅白鴿黨馮煒光同人民力量黃毓民各說各話，馮煒光尋日拉埋幾個黨友去搵台北經濟文化辦事處，希望向國民黨攞番當日嘅閉路電視錄影。黃毓民尋日就召開記者會，堅稱冇打過馮煒光，又話人民力量已決定杯葛壹傳媒，批評該集團根據片面之辭誤導市民。佢仲話：「呢啲所謂嘅民主派（民主黨）抹黑、打壓，然後『蘋果黎』（肥佬黎）」就幫拖！」

毓民話，早前facebook針對佢屋企人嘅留言令佢覺得好憤怒，但當日只係好克制咁手指指，並堅稱無揮拳打過馮煒光，而台灣警察亦無搵過佢，自己無被通緝。自言參政多年好攰嘅毓民話，過往肆無忌憚議政令家人、人民力量嘅形象付上代價，所以佢慎重考慮係咪應該退下來喎。

人民力量尋日宣布，為表不滿壹傳媒根據片面之辭誤導市民，會無限期杯葛該集團，所有執委同立會議員都唔接受該集團訪問，亦唔會通知該集團採訪。毓民對於壹傳媒就有關事件嘅報道手法相當憤怒，又話該集團唔係第一次畀人杯葛。