政壇：葉劉建仔鬥快搵雙非抽水

大批腹大便便嘅準媽媽同推住嬰兒車嘅婦女喺大雨下上街反內地孕婦，尤其係父母均非香港人嘅雙非孕婦來港產子，將民間對雙非孕婦嘅怨氣再推向新高點，唔少政黨為咗九月嘅立法會選舉都急急跟進。新民黨主席葉劉淑儀好早已經表態反雙非，贏得唔少本地孕婦嘅歡心；民建聯副主席蔣麗芸尋日都拋出絕招，話會喺三月嘅北京兩會上提案，要求內地協助解決雙非湧港產子，兩黨及時攔網搶佔先機，其他政黨執輸喇。

趁三月兩會提案

雙非孕婦衝閘，唔單止影響產房服務，仲連累本地嘅急症服務，但係由食物及衞生局到保安局都束手無策，煲呔曾雖然已經向內地開聲，弊在成效遲遲未見，佢有幾多牙力更令人懷疑。

尋日建仔開記者會，並由副主席兼全國政協委員蔣麗芸（Ann）擔大旗，佢哋一方面拆解點解有咁多內她孕婦湧嚟香港生BB，同時打算從源頭出發，喺三月嘅北京兩會時，正式提案要求內地協助解決雙非孕婦來港生育，建仔唔少黨員都係人大代表同政協委員，今次提案影響力一定唔細。

更重要嘅係，同樣有唔少兩會成員嘅自由黨、經濟動力甚至專業會議喺民意之下都好難唔跟，不過，到時跟都係為建仔抬轎喇。

建仔急急出招，都未必搶得到新民黨嘅風頭，事關葉太好早已經企出嚟要求港府尋求人大釋法杜絕雙非，日前團體請願後，葉太更恍如代言人咁加入呼籲，喺呢場反雙非孕婦嘅民意戰中穩佔主導位置，睇番嗰啲到依家都只係敢鬧政府冇應變方法減輕醫療界壓力嘅政黨，葉太冇轉彎抹角、睇怕更易得民心！