惡官狗仗人勢 官場群獸亂舞

中華大地官場動物化，嗱，內地有汕尾「狗官」作威作福，恐嚇村民，辱罵媒體，香港亦不遑多讓。地政總署爆出前線職員狗眼看人低，對投訴市民亂咁吠，爆粗大罵十分鐘，簡直令人大開眼界！

大家可能會問，喂，港衙裏面嘅涼血動物比比皆是，對小市民惡形惡相嘅劣行更加無日無之，太一叮講緊邊單呀？呢，本報日前報道，上水居民劉先生不滿重鋪路面工程封閉行人路，市民被迫「鋌而走險」行出馬路。哈，點知投訴變受辱，被一名地政總署職員指係刁民，話佢胡亂投訴，仲被連珠炮發粗言穢語問候添，大家話呢種官場動物係咪同狐假虎威嘅內地狗官同出一轍吖？

嗱嗱嗱，內地狗官惡行曝光之後，繼續大搖大擺做土皇帝，咁狗口長不出象牙嘅港產官僚，下場又如何呢？經過投訴人鍥而不捨追究，事情終於有新發展，地政總署回覆本報指，「爆粗男」承認向投訴人爆粗，「並對此事深感抱歉」，署方將按《公務員事務規例》採取「適當的跟進行動」喎。

即係咁，身為公僕，幫唔到市民排難解憂已經係失職，仲要粗口辱罵市民，受到懲治係罪有應得。開講有話，一犬吠影，百犬吠聲，署方若然唔殺一儆百，其他衙差容乜易有樣學樣，動不動就用粗口嚟招呼市民㗎？咁仲成世界嘅！

之不過咁，講到呢度，太一叮依然無法放心。大家知啦，港產官僚出名官官相衞，「適當的跟進行動」往往就係冇跟進行動，囂張官僚隨時繼續狗仗人勢，惡形惡相欺負市民。

話時話，香港官場動物化，真係愈來愈令人擔憂，部門衙差狗仗人勢，蠅營狗苟，身居高位嘅一樣獸才輩出。有身為前高官的「豬形」特首參選人唐英年啦，又有「禿鷹」警隊一哥曾偉雄，加埋其他大官小吏群獸亂舞，唔怪得香港咁烏煙瘴氣啦！

政府總部成惡菌溫床，官僚系統就似百獸樂園，咁搞法，香港就算唔沉淪，都遲早變妖獸都市啦，叮！