政壇：政商定格：恒生五巨頭總行影拜年照
臨近農曆新年長假，恒生銀行有個傳統，就係最高級管理層會同大家拜定早年，今年就由「五巨頭」出場，除咗恒生副董事長兼行政總裁梁高美懿同恒生中國副董事長兼行政總裁薛關燕萍之外，仲發覺另外三位男士管理層都用新名銜同大家拜年。
佢哋包括企業及商業銀行業務總監林燕勝，因為佢舊年榮升，睇晒企業同商業銀行，喺拜年相入面首次粉墨登場；而調任零售銀行及財富管理業務主管嘅陳力生，亦以新名銜見大家；當然唔少得新入局嘅執董馮孝忠。
仲記得往年恒生高層都喺唔同分行門口同大家影相拜年，但今年一於搞搞新意思，首度回歸總行博愛堂，喺紀錄恒生歷史嘅巨型掛氈前面影。
梁高美懿（中）帶領恒生高層手持財神同生肖龍年畫、福袋、年桔同金元寶拜年。