政壇：搞搞政：鐵頭仁累卿姐兩被挑機

白鴿黨副主席劉慧卿尋日喺立法會政制事務委員會繼續怒數小圈子選舉，又話稍為睇過台灣總統選舉嘅人，見到特首呢個小圈子選舉都會笑爆嘴，就喺呢個時候，委員會主席譚耀宗扮不經意咁話：「貴黨都有人出嚟選喎！」卿姐平時鬧人就多，畀人食住花生技術擊倒就唔多見，今次為咗撐鐵頭仁選特首，竟然搞到老貓燒鬚。但佢好快就反擊，叫建仔「唔使理我哋敝黨啲嘢嘅」，仲話好期待建仔派人出選。

轉頭佢將槍口轉向選舉事務處，要求處方盡快交代喺選舉期間係咪要議員「奉獻」晒全港街頭橫額，又話冇理由因為宣傳一個小圈子選舉，而要令一啲真正有需要嘅人掛唔到橫額。點知建仔嘅議員忍唔住又出嚟挑機，叫卿姐唔好鬧得咁大聲，事關佢喺區內都唔知見到幾多鐵頭仁選特首嘅宣傳橫額。一而再畀人窒，搞到卿姐冇晒面，要怪就怪鐵頭仁畀西瓜皮佢踩啦！