政壇：七月喺邊度Greg蘇無話兒

真係一命二運三風水，一個人嘅際遇有時真係好難解釋，好似商務及經濟發展局局長蘇錦樑（Greg）咁，想當日佢做副局長之初，掀起國籍風波，大家都以為佢係咁先，點知後來佢前老闆劉吳惠蘭因病呈辭，佢就冷手執個熱煎堆做局長。

一味靠拖 搵人代答

尋日佢同兩位常秘出嚟同傳媒茶敍，席間數起多項工作，全部都唔係遲大到就大讓步。例如傾咗一年有多嘅競爭法，舊年佢提出六大讓步修訂後，商界怨言先至稍為降低，令條法例觸礁機會減低，但邊啲公營機構要受規管呢個戲肉，由原先舊年年底出台，拖到依家都未見影，尋日佢都係話「好快趣」，總之有信心今個立法年度內通過，真係等到人頸都長。

仲有電視台好關注嘅免費電視牌照審批，三家電視台前年遞申請，審到依家都未審完，佢又話「盡快」o架啦，行政會議內容保密嘛，所以唔講得太多。至於商品說明條例，本來就話舊年上立法會嘅，但到依家又係影都冇，大家有耐性就等吓啦。仲有一樣嘢都幾值得關注，就係香港酒店用地問題，事關訪港旅客人數屢創新高，但呢個問題，佢多數交番畀旅遊事務專員容偉雄答。

均真啲講，Greg蘇都有回應一啲問題嘅，好似D&G事件，佢話佢都唔贊成歧視行為，相信市民會理性表達意見。

最後被問到明年此時仲會唔會同大家茶敍？佢只係笑而不答，似乎一切都係心照不宣。梗係啦，有冇得留低唔到佢決定，名副其實「Greg蘇無話兒」。