車輛送檢出蠱惑 漏洞不堵危機多

提起車毀人亡，大家聯想到啲乜？特首參選人唐英年口舌招尤挑釁「八十後」？東區走廊橋躉移位嘅大裂痕？定係港鐵壞車當食生菜嘅駭人事故數字？嗱，以後可能又多一樣，就係驗車蠱惑手法。

驗車點樣出蠱惑呢？未入正題前，先睇一單醜聞。廉署早前偵破驗車貪污案，揭發運輸署指定嘅兩間驗車中心職員受賄，畀性能未達標嘅私家車通過年檢續牌。話係醜聞，一嚟因為有人為咗錢而不顧他人安全，放行唔合格殘車害人；二嚟咯喎，港府監管驗車不力，搞到馬路炸彈周街走，就算唔係幫兇，都係顢頇失職嘅大庸官！

好嘞，入正題，驗車中心受賄集團一網成擒，驗車弄虛作假嘅問題係咪就從此徹底解決呢？答案係否定嘅。事關受賄醜聞之後，驗車中心對送檢舊車一律驗屍咁驗，本來執正嚟做係好事，但就衍生另一個新問題，就係維修費大增，借用唐唐最新金句就係「貴到無倫」。於是乎，罔顧道路安全嘅無良商人又有新財路嘞。

本報發現，有車主為減省維修費用，居然不惜去深圳自行購買劣質汽車零件，甚至有本港車房大舉入貨，當中仲充斥大量冒牌貨，以圖車輛送檢時可以蒙混過關。

俗語話，出得嚟行，預咗要還。為求通過驗車而行蠱惑，隨時要還條命。有車房職員踢爆，有客戶嘅豐田私家車煞車失靈，原來塊煞車皮係冒牌貨，車主鋌而走險，簡直搵命博。汽車業人士更警告，內地超低價汽車零件品質低劣，劣質煞車皮落斜路煞唔到車不特止，仲會隨時因承受唔住高溫而飛脫，搞到車毀人亡，連其他道路使用者都一齊受害！

嗱嗱嗱，原來睇錢仲大過人命嘅，唔止係受賄嘅驗車人員，仲有缺乏危機意識嘅車主同唯利是圖嘅車房東主。港府堵塞驗車漏洞，無理由做一半、唔做一半咁不負責o架，道路安全，人命攸關，唔該快快做嘢！

業界講得啱o架，劣質零件未必馬上損壞，驗車中心難以監測，運輸署應該另設防線，以發牌制度確保車房嘅專業操守，杜絕蠱惑招數通過驗車續牌從而令到路上危機四伏。

港府聽到未呀？對驗車中心受賄造假，你哋就話後知後覺啫，依家本報幫手揭露蠱惑招數造成驗車危機，你哋無理由闊佬懶理喇啩。如果唔係，萬一搞到車毀人亡，小心你哋會好似劣質煞車皮咁被人換走，叮！