SUN熱辣：馬路炸彈通街走

政府指定驗車中心早前爆出懷疑受賄醜聞後，令驗車人員對問題車輛實行「執到正」。以往車房流行為年檢車輛提供「包驗」一條龍服務絕迹之餘，車輛維修費亦相應飆升。本報發現有人為減省維修費，轉而到深圳汽車零件市場購買一些劣質汽車零件，甚至有本港車房大舉入貨，當中更不乏冒牌貨，以圖送檢時成功過關。記者在深圳購入多款冒牌零件給汽車專家檢查，發現質料差劣，裝配上車後，足以成為馬路炸彈。

根據現時法例，車齡滿六年以上私家車必須驗車合格，才可申領行車證。過往部分車房會提供俗稱「包驗」的服務，當中除了因為車房清楚驗車基本要求，「對症下藥」外，部分與驗車人員稔熟，只為車輛進行簡單保養便送檢。但自從爆出驗車中心人員受賄後，驗車要求即時收緊。

車主阿強的座駕車齡超過十年，踏入一月剛夠期年檢：「以前拎去車房，都係二、三千蚊搞掂，今年就要成五、六千蚊，車房老細話如果仲想平啲，可以搵啲平價老翻零件，價錢平一截，只係無原廠件咁耐用，最緊要換咗啲新零件，過到驗車嗰關。」

事實上近期確有不少車房採用不少劣質零件，位於深圳的八卦嶺汽配廣場，更是香港車房另類零件供應倉。

深圳老翻百零蚊有交易

「豐田煞車皮都係百零蚊，包裝似到十足十，你鍾意當正價貨賣畀啲客一樣得。」記者隨便走進一間配件店，職員以為是來自香港車房的人，落力推銷冒牌貨，更指如果想賺到盡，大可以正貨價呃客。「你裝好之後咪畀番個包裝盒畀佢囉，零件都裝咗上去，唔通佢捐入車底睇咩。以前你哋好多新界嘅車房會嚟幫襯，近排唔知點解多咗批新客，有啲仲大批入貨，我哋成日要成批零件咁速遞去香港。」記者表示只要驗車合格，該名職員即大派定心丸：「呢件零件真係用得㗎，只係冇咁耐用，而且驗車都唔會理你係咪冒牌貨啦。」

記者將多款冒牌貨，包括售價分別為人民幣十元的風隔，人民幣十五元的偈油隔及人民幣一百三十元一套的煞車皮，交給香港汽車會副會長江日雄檢查。

江日雄直指這批零件品質十分低劣：「風隔主要是透過過濾紙隔開雜質唔會走入引擎，雖然佢表面睇紙張厚實潔白，但睇到過濾紙密度好低，代表過濾功能差。」至於偈油隔接駁口偏軟，令接合時有虛位，使用時出現漏油甚至突然脫掉。

煞車皮難抵高溫易飛脫

他認為使用劣質煞車皮危機最大。「煞車皮嘅皮面其實係由銅同金屬物料混合製成，皮面出現大量裂紋，即係話喺混合過程中受壓唔夠，使用時會影響煞車時嘅摩擦力，普通斜路煞車過程中，隨時產生三、四百度攝氏嘅高溫，咁嘅質素根本承受唔到咁高溫度，唔單止煞唔到車，仲會因太熱成塊煞車皮飛脫出嚟。」

使用冒牌貨，後果可大可細，在大埔經營車房的青哥說：「之前有個客攞咗部豐田私家車落嚟整，話新換咗個煞車皮之後，落斜路時竟然煞唔到車，咁我即刻拆出嚟睇，外殼雖然印住豐田個商標，不過成塊皮輕好多，做工又粗糙，分明就係假嘢，好彩佢換得快，否則隨時搞出大車禍。」

運輸署發言人指，如選用不當零件以致未能符合法例要求，在年檢時將不會通過檢查，根據檢測紀錄，不合格項目主要包括車身，廢氣排放及照明系統。自廉署去年十一月採取行動後，私家車進行年檢的合格率由平均超過九成下降至七成多。