SUN世代：二級古蹟開餐廳

步入灣仔船街，一幢充滿古舊色彩的建築物即映入眼簾，原來是一間私房菜餐廳。該樓宇建於一九三○年代，是一幢三層樓高的歐式唐樓，已被列為二級歷史建築。經木欄柵大門進入餐廳，盡見綠色紙皮石地板，又長又窄的綠色長樓梯、木扶手全都散發濃厚的懷舊色彩。

徐蒝自爆一看到這幢歷史建築已一見鍾情：「我好鍾意，畀我感覺好懷舊，好似傳統啲冰室！」為了奪得心頭好，徐蒝膽粗粗致電巿區重建局申請，「本來我係申請另一座古蹟，但因為畀人申請咗，巿建局話有一座好啱我，我一見到就知係呢度！局方好Buy我只用有機食物，以合理價錢批咗畀我！」

不過，要在二級古蹟內開設餐廳，絕非易事，「因為建築物受保護，好多嘢都唔改得，就算釘一口釘都要申請。為咗保存內裏嘅建築色彩，我個廚房要鋪過啲磚同升高地台，咁就唔會破壞到原本設計！」