SUN世代：文人揸鑊鏟食得好

眼前的徐蒝，頭戴Cap帽，穿上白色廚師衫，驟眼看似文化人多過廚師。從事廣告設計十多年的她，因為喜歡食，毅然放下廣告工作走入廚房。「棄筆揸鑊鏟」絕非易事，樣樣由頭學起，落單、買餸、下廚一腳踢，但因為是興趣，再苦也沒有埋怨。徐蒝對食物絕不「隨緣」，她「Like food，enjoy food」，而「Life is too short」，應食得更好，好好享受食物及人生。

徐蒝愛上煮食，像是與生俱來，「我細細個已經好鍾意煮嘢食、好鍾意儲食譜，十二歲第一次入廚，跟住本Cook book學煮羅宋湯，雖然燶咗少少，但媽咪都話好好味，畀咗好大信心我！」兒時已在廚房搞搞震的她，不時幫媽咪煮飯，整角仔、包湯圓更成為她的童年小玩意。

徐蒝愛食，但第一份工並不是廚師，反而是走入多姿多彩的廣告界：「做廣告設計都離唔開食。因為我對食有興趣，接觸到好多包裝食物，有時同啲公司傾傾吓，佢哋話我啲食譜得，仲幫佢哋做埋食譜添！」在廣告界打滾十多年，○三年她突然搬到元朗圍村「與世隔絕」，以為她要思考未來前路，原來是想偷師，學煮圍村瀕失傳菜式，她還自設小農場耕種，自給自足。

一道石磨年糕「紅金寶」為徐蒝打響名堂：「初初只做石磨糕點，點知三日就賣晒，之後好多人走入嚟話要食私房菜，於是我就做埋私房菜，當然唔係日日煮，因為我仲兼職做廣告設計！」名氣漸大，徐蒝開始有壓力，「因為糕點係人手磨，所以每日只可以做十份，我要聽電話，落單同煮都係自己一腳踢。有時太忙，有客人打嚟落單，我接唔切，惟有呃佢負責人行開咗，慢慢兼顧唔嚟，惟有放棄廣告設計工作！」

有機農場自給自足

入廚辛苦，全職入廚更辛苦，但徐蒝樂在其中，自言能夠寓興趣於工作，是件美事。而她對食材尤其執着，堅持採用有機食材，「Life is too short，don't waste time for 垃圾！要Like food，enjoy food！」○八年她開設「鴛鴦飯店」，為確保顧客能夠Enjoy food，餐廳開張前三周，她接手了一個有機農場，為餐廳提供食材。她連煮食用具也很執着，更創意十足地運用兩個黃陶土花盆製成類似「窰」的燒雞爐，烤出招牌菜「黃土雞」：「我好鍾意烤嘢食，但覺得不銹鋼烤爐好醜樣，我鍾意靚，於是諗到用兩個花盆整個爐，我以前屋企都有呢種爐o架！」

至於未來目標，她希望能進軍國際，與外國人分享結合傳統與現代的中菜：「好多人認為中菜只係咕嚕肉同炒飯，我希望推廣我啲有機食材同菜式，等多啲外國人見識真正嘅中國菜係我嘅使命！」

徐蒝小檔案

現　職 鴛鴦飯店總廚

興　趣 耍太極、烹飪、旅遊