政壇：陳永棋教路免搭「沉船」
意大利巨型郵輪「協和號」日前觸礁翻側，差啲重演鐵達尼號悲劇。尋日喺一個公開場合見到全國政協常委陳永棋，佢自詡係郵輪專家，有三十年郵輪嘅經驗，搭過不下三十艘郵輪。
佢話今次出事嘅「協和號」級數只屬一般，佢搭過意大利郵輪，覺得人太多太擠迫，無論係船身裝嵌、餐飲同船員質素方面都唔好，奉勸大家最好搭中型船。至於船長同船員，佢就話最好揀英國、德國同北歐嘅水手，質素會較勝一籌。其實，佢下周六又會上船，同太太飛杜拜散心，喺海上過埋農曆新年，坐足十五日先返香港，真係寫意。
跟住仲見到富豪趙世光千金趙式和同老公Dominic李承康，有坐郵輪經驗嘅Dominic話唔怕再坐，事關坐飛機坐車都會有危險，邊擔心得咁多呀！
