政壇：林健鋒插煲呔曾

煲呔曾呢個夕陽政府仲有幾個月任期就夠鐘走人，雖然冇乜人對佢有期望，但仍有唔少人對佢有微言，好似經常同煲呔曾一齊食好嘢、又食過煲仔飯嘅經濟動力召集人Jeffery林健鋒就係其中之一。

轟民主進程歎慢板

當年煲呔曾競逐連任時，聲稱當選後會將利得稅降至百分之十五，所以贏到唔少商界掌聲，但依家任期就完，佢不但唔敢履行承諾，仲不停向外界放風，話現時經濟情況好難減稅，聽完佢講，唔少商界即刻一肚氣，覺得畀人過橋抽板。所以做商界代表嘅Jeffery，就算同煲呔曾幾老友，都要插佢唔做嘢。

Jeffery尋日接受電台節目訪問時，被問煲呔曾值幾多分，佢好留情面咁講，話整體表現都算合格，但幾多分就唔方便畀，自己心中有數啦。其中最令Jeffery不滿嘅，就係煲呔曾唔肯減利得稅啦，除咗咁之外，Jeffery仲覺得煲呔曾喺民主進程方面慢咗啲，如果步伐快啲就最好。估唔到連建制派都有呢個諗法，證明煲呔曾真係做嘢好慢囉。

至於其他方面，Jeffery話覺得煲呔曾好少落區，變相令佢觸摸唔到民情，唔知人諗乜，如果多啲同市民溝通，唔止有助施政，仲可以幫佢建立威信喎！但講講吓，佢就話煲呔曾得番幾個月任期，都唔期望佢冇乜大改變啦。

聽佢咁講，似乎係對煲呔曾餘下呢幾個月任期再冇乜寄望喇，既然係咁，可以慳番啖氣暖肚，為乜仲要開聲插煲呔曾，呢啲咪叫「愛之深，責之切」囉！