港府監管失靈 亡命小巴失控

記得早排甘肅嘅校巴慘劇嗎？咪以為嚴重超速、超載嘅「地獄快車」只會喺內地貧困地區出現，本港「亡命小巴」同樣牙煙，奪命車禍已經發生過好多次喇。

咦，港府唔係話要落重藥改善小巴安全嘅？係，運輸及房屋局話就話早就提出規管措施，包括加強規管小巴限速器、強制加裝黑盒、新入職司機必須修讀職前課程及喺小巴上展示司機證等等，可惜吖，由於講唔掂業界，依家仲係議而不決，決而不行。

呢，尋日多名小巴及運輸業界代表踩上立法會表達不滿，批評新措施標籤業界，阻礙新人入行，加裝黑盒會加重負擔，更指當局想毀滅小巴行業。有人甚至揚言，就算破產亦會申請司法覆核喎。唉，弱勢政府動輒得咎，寸步難行，睇嚟都幾難傾得埋欄。

莫講話推出辣招難成事，就算有法可依，有關部門監管甩漏，執法不嚴，法例咪一樣形同虛設。按規定，所有小巴舊年十一月底前必須完成安裝限速器，可惜好多都係裝假狗，就算唔係裝假狗，都係得個睇字嘅咋。嗱，有小巴時速去到百幾公里，警號係咁嘟，司機係咁飛，由荃灣入深井五分鐘搞掂，問你怕未。

除咗超速，仲有超載，乘客人數唔係按法例規定，而係由司機話事。所以咯喎，有啲小巴明明十六個位已經坐滿，司機半路仲停車上客，多出嘅乘客就喺司機位隔籬半踎半坐，簡直視法例如無物。

有立法會議員直斥當局把關不嚴，監管不力，令小巴超載超速情況失控，認為單靠勸喻同業界自律唔足夠，除咗要檢視限速器有冇出蠱惑，更有效嘅方法係引入黑盒記錄車速同行車狀況，打擊違例駕駛。

冇錯喇，小巴安全失控責在港府。如果唔係《太陽報》同《東方日報》年前踢爆運輸署改善小巴安全歎慢板，申訴專員公署其後介入調查，揭發當局十年前已承諾制訂改善措施，後來又冇咗件事，新措施睇怕依家仲「研究」緊。

港府監管失靈，亡命小巴失控。小巴係市民使用最多嘅交通工具之一，但亦被保險業形容為全港最危險交通工具之一。計太一叮話齋，改善小巴安全刻不容緩，唔該當局同業界齊齊坐低，唔掂傾到掂，盡快就立法規管達成共識，千祈咪攞市民生命較飛，搞到香港淪為最危險都市呀，叮！