政壇：葉劉王倩儀齊睇囡囡畢業
新民黨主席葉劉淑儀愛女Cynthia葉榮欣將於五月大學畢業，做媽咪嘅見到囡囡戴四方帽當然好雀躍啦，屆時仲會飛去美國出席愛女畢業禮添，但今年葉劉唔使再孤身上路嘞！
話說葉劉日前同環境局常秘王倩儀傾開，先知大家個女都係入讀美國名校賓夕凡尼亞大學，仲係同一屆畢業，但Cynthia主修數碼動漫設計，而王倩儀囡囡就讀傳理系。橫掂順路，兩人於是約埋一齊搭機赴美，落機後再坐同一架車去大學，慳番車費之餘又唔怕悶，一舉兩得。葉劉話除咗去捧囡囡場之外，仲會順便去紐約同華人聚集嘅地區，宣傳吓自己同新民黨，之後會返名牌母校史丹福大學緬懷讀書時光，最後會喺西岸返港，行程相當充實。