政壇：搞搞政：特權法查中電工專聯內訌
富貴黨同經濟動力呢對冤家早前同專業會議、商界黃宜弘等人成立咗工商專業聯盟，但去到政策層面議題，雙方分歧就現形。
最近立法會要求用《立法會（權力及特權）條例》徹查兩電狂加電費事件，身兼立法會內務委員會主席嘅富貴黨主席劉健儀，將於下月八日大會上提出動議，表決係咪動用特權法就加價向兩電索取機密資料。富貴黨前日向傳媒吹風，講明支持用特權法徹查事件，但會修訂字眼，例如屬機密或敏感嘅商業資料就唔使向立會披露。咁樣修訂，睇怕都查唔出啲乜嘢，但估唔到連呢條冇牙力嘅修訂，經濟動力都唔肯支持。
經濟動力召集人林健鋒話兩電都算係私人公司，如果立法會下下用特權法呢把尚方寶劍，工商界會好擔心郁啲就畀人查，所以工商界意見好清晰，就係唔支持用特權法嘞！
