今日小學逼爆 明日香港陸沉

「雙非」學童激增，港府束手無策。隨着愈來愈多內地孕婦來港產子，唔止逼爆醫院，連幼稚園及小學亦開始淪陷，港人子女居然連就近返學呢啲最基本願望都唔容易達到，真係講都冇人信。

當局估計，本學年適齡升讀小一嘅一萬六千多名雙非學童，估計約兩成即三千幾人有意入讀本港學校。呢批學童湧港，北區學校首當其衝，因為學額有限，教育局罕有咁建議有子女跨境返學嘅中港家庭，考慮屯門、大埔等區小學。

查實兩成比例只不過係當局斷估，有雙非家長話到明，送子女來港讀書，由幼稚園到大學畢業，政府資助超過百萬元，咁着數唔攞就笨咯。所以話，預測根本靠唔住，雙非學童回流比例隨時過半甚至有六、七成都唔出奇，到時唔止北區，睇怕連東區、南區、西區學校都逼爆，問你驚未！

話時話，被逼爆嘅又何止學校呀，醫院產房、急症室同健康院已先後淪陷。本地BB依家要同雙非小同胞爭床位、爭急症室、爭健康院，大個咗，又要爭學額、爭就業、爭住房、爭社會福利，你話點算好。

叮，其實問題存在已經唔係一日兩日。二○○一年終審法院裁決「莊豐源案」，無論父母係咪香港人，其在港出生嘅子女均可享有居港權。司法大開綠燈，內地孕婦有恃無恐，赴港產子源源不斷，當局對問題熟視無睹，拖得就拖。最搞笑就係，港府同內地多年來簽埋一大堆合作協議，唯獨對港人最關注嘅內地孕婦問題隻字不提，問題日積月累，終於爆煲。

有特首參選人一味掛住抽水，話要採用行政手段同加強入境抽查，又話如果孕婦衝關，可禁止入境兩年喎。統統止唔到咳，講咗等於冇講，叮！

其實，內地同胞來香港爭奪資源，又點止咁多吖。炒樓、搶奶粉、掃名牌……兩地居民矛盾不斷升級，最近仲搞出一場名店風波添。解鈴還須繫鈴人，雙非問題港府難辭其咎，頭痛醫頭、腳痛醫腳於事無補，惟有提請人大釋法至可以標本兼治。可惜吖，今屆政府仲有唔到半年就收皮，以煲呔曾嘅縮骨本性，有乜手尾都留畀下屆政府執，話之香港陸沉啦，叮！