政壇：搞搞政：肥亨借《天與地》撐市況見底
播到尾段被內地禁播嘅電視劇《天與地》街知巷聞，連中策主席馬時亨尋日出席青年獎勵計劃擔任頒獎嘉賓，喺講詞末段都引用插曲《年少無知》嘅歌詞，但對於劇中嘅金句：呢個城市正步向死亡（This city is dying），佢就唔同意。
肥亨話早於主權回歸嘅時候，就有外國言論話香港已死，但係事實證明呢個論調係錯嘅，香港咁多年嚟雖有起伏，但仍然欣欣向榮。反而，每當有呢種睇淡嘅言論出現，可能反映市況已經見底。
身為中策主席，佢話過去一年搵唔到合適嘅投資目標，然而市場經過一番調整，好多投資項目嘅估值都較為合理，故此今年嘅市況應比舊年為佳。佢認為因為通脹，資源股有追捧價值；至於房地產，尤其係涉內地嘅，佢就呼籲大家要小心嘞！
