政壇：唐唐落區連遇騎呢事

特首參選人唐唐尋日突然到天后港鐵站外派單張，之後主動提出加強行政措施堵截「雙非」孕婦，認為倘有「雙非」孕婦違規來港產子，佢就要面臨兩年入境限制期，又話可參考外國經驗禁止足三十二周孕婦入境，用意明顯係避免喺「雙非」問題上畀對手CY梁振英撳住嚟打。

唐唐落區有奇遇，首先電視藝員王俊棠同唐唐反映英皇道斑馬線太窄；之後又遇到已故樂壇巨星梅艷芳胞兄梅啟明，期間梅啟明仲以梅姐遺產案為例，向唐唐反映司法黑暗嘅問題，但唐唐冇乜特別反應。要做特首就係要面對奇難雜症o架啦！

CY尋日會見融樂會三名選委，會後三人都話仲未決定投票意向，但會計界蒲錦文同法律界韋智達都話，唔一定提名畀泛民候選人鐵頭仁，明顯畀CY嘅少數族裔政策打動。

此外，組織泛民團隊參選社福界選委嘅白鴿黨中常委羅致光承認，曾向部分社福機構高層發電郵，建議佢哋若未決定提名唐唐，最好就唔好參選選委會，因為如果提名唔係北京屬意嘅人選，可能會對機構日後嘅工作帶嚟不便。佢話今時今日佢會支持白鴿黨主席鐵頭仁參選特首，又話自己無意加入政府做問責局長。