政壇：陳維安冇牙老虎

教育局副局長陳維安呢排都算黑仔，先係分拆教材觸礁，繼而教資會撥款畀立法會否決。唔知係咪諸事不順，谷埋一肚氣，尋日竟然無啦啦發火！

話說新民黨葉劉淑儀尋日喺立法會提問城大將自資銜接學額由近七百個，大幅減到得番九十個，究竟有冇諮詢教育局？同埋城大開辦自負盈虧嘅獸醫學院，會唔會影響到其他課程嘅質素？

本來呢個問題冇乜殺傷力，大家都以為陳維安hea答算數，點知佢答得鬼死咁火。佢嘅答覆都幾有骨，好幾次都擺到明摑城大一巴，好似話城大享有學術自由同院校自主權，但唔代表院校可以罔顧公眾利益或者各界批評。佢又話城大以後作出削減自資學位時，要充分考慮學生同公眾利益，即係暗指城大依家冇做到囉。

唔用公帑政府冇say

至於城大開辦獸醫學院，佢打開口牌，話唔想城大開設。佢話教資會認為城大唔適合用公帑開設獸醫學院，係因為城大嘅診治實習地方、學術評審同財務方面都唔合格。佢仲話如果城大用自負盈虧方式開辦，唔代表其教學質素就會合格，希望城大諗清楚，會唔會影響到三三四新學制。

城大係有權處理自資銜接學額，而獸醫學院亦冇問到教資會攞錢，喺冇用過公帑底下，政府係管唔到亦冇say，陳維安呢隻冇牙老虎竟然兇城大，究竟係佢搵城大吐烏氣吖，抑或係佢同城大之間有乜恩怨情仇？咁就只有佢至知。至於城大校長郭位啃唔啃得落畀高官鬧，又或者會唔會反撲呢隻冇牙老虎，大家就要拭目以待嘞！