迪士尼扭虧為盈 米老鼠莫再趕客

踏入二○一二年，壞消息未停過，添馬艦政府總部淪為惡菌溫床，禽流感捲土重來，獅子銀行又傳裁員、全球著名購物街排名香港居然尾二……夕陽政府日暮途窮，唔通香港真係冇運行？咦，終於聽到一個稍稍令人欣慰嘅消息嘞，香港迪士尼樂園連續第二年錄得盈利，總算苦盡甘來，唔使年年虧損咁羞家。

迪士尼公布業績，過去一年無論入場人次、商品零售、餐飲銷售同酒店入住率，齊創新高，稅前盈利超過五億元，增幅超過一倍，係開幕六年以來表現最好一年。嗱嗱嗱，迪士尼扭虧為盈，香港人真係還得神落㗎！大家知啦，迪士尼嘅大股東係港府，○五年開幕之後年年虧損，燒錢快過燒煙花，回本之路仲崎嶇過小熊維尼嗰條歷險之旅，納稅人唔使玩過山車，都已經嚇到一額汗啦。

往事已矣，來者可追，迪士尼本來係充滿夢想嘅地方，家陣業績坐上升軌列車，總算帶畀香港人一個希望。咁究竟乜嘢原因令迪士尼起死回生呢？講到尾，都係要靠內地財神爺撐住。根據迪士尼數字，上年入場人次上升一成三至五百九十萬，內地旅客佔咗當中嘅四成五，本地客源則佔三成一。好明顯，米奇老鼠返魂有術，主要係靠內地同胞打救。

即係咁，迪士尼受惠於個人遊北水南調嘅大氣候，扭虧為盈當然係好事。之不過咁，內地客源撐起半邊天，一則可喜，一則可憂，表面生機勃勃，實際危機四伏。其他唔講吖，上海迪士尼兩年後開幕，所謂近水樓台先得月，加上「全球最大迪士尼樂園」嘅宣傳噱頭，如果你係內地同胞，寧願揀去上海，定係長途跋涉來港見識一個「迷你版」樂園？

嗱，雖然迪士尼以米老鼠做代表，但係營運就千祈唔可以鼠目寸光，故步自封。首先梗係要繼續擴充、提升設施啦，香港迪士尼係全球最細呢個事實難以改變啫，但係都唔好做全球最不思進取嗰個o架，係咪？

其次咯喎，就係改善管理水平嘞。呢，迪士尼早年咪因為控制人流不善，搞出關門趕客醜聞嘅，呢類咁離譜嘅事情更加要杜絕！

一句講晒，居安思危，思則有備，備則無患。迪士尼面對挑戰，一定要居安思危呀，如果唔係，萬一業績後勁不繼，樂園再變失樂園，咁就丟架o架嘞，叮！