SUN熱辣：鄰近深圳灣富泰邨變散貨基地

本港水貨客問題存在已久，但過往只集中在鄰近羅湖口岸的上水、粉嶺港鐵站，本報直擊的水貨軍團卻以屯門富泰邨為根據地。屯門區議員陳文偉分析，與富泰邨的地理位置，及深圳灣口岸較少人次使用有關。

「如果喺富泰邨坐巴士去深圳灣，車程只係十五分鐘，車費亦只需九蚊，絕對比由上水去羅湖平同方便，所以吸引到水貨客選擇呢度作為根據地。」陳文偉指出，富泰邨毗鄰港深西部公路，是離深圳灣最近的公共屋邨，而於深圳灣過關的人流，亦遠較羅湖口岸少，令水貨客能更快通關。

陳文偉曾就事件向房署和領匯反映，但兩者卻互相推卸責任。他說：「房署話嗰個位係領匯管，所以唔理；領匯又話啲水貨客無犯法，佢哋亦都無執法權，唔可以驅趕，根本就係卸膊，無心解決問題！」他認為，領匯可記下相關車輛的車牌，將之列入黑名單，嚴禁他們再入邨。