政壇：郭小菱冒八號風撲床位
龍年在即，唔少父母自然都希望生番個「龍仔」、「龍女」，咁就可名正言順望子成龍嘛！而喺窩輪界都有生B喜事，原來法巴上市衍生產品部董事Shirley郭小菱已懷有「小龍女」五個幾月，預產期係今年五月，可喜可賀呀。
Shirley話有咗BB約5個幾禮拜嘅時候，就「拿拿臨」趕去醫院交按金訂床位，嗰日仲要係打緊八號風球，夠晒難忘，但朋友話已經算遲，若再遲啲就隨時位都冇呀。佢又話唔係刻意揀龍年生B，只係咁啱啫，又笑言生女好，女仔比較聽教聽話呀。佢嘅同事、法巴上市衍生產品部聯席董事趙海珠更半開玩笑補充，原來生B都同窩輪投資有啲似，就係要好好計劃部署呢！
郭小菱已懷有「小龍女」五個幾月。（資料圖片）