政壇：搞搞政：許曉暉戰港島？

香港有逾百萬福建鄉親，唔少都聚居喺北角，令北角有「小福建」嘅稱號，祖籍福建嘅港區全國人大代表「蔡菜子」蔡素玉，喺二○○○同○四年兩屆立法會港島區選舉中，都喺福建幫支持下當選，亦令佢儼如福建幫嘅代言人，但喺○八年因建制派分票不均，佢最終落敗，無緣入局。

據聞，福建幫對冇咗代言人一直耿耿於懷，同時佢哋過去幫建仔「抬轎」，亦未見對方有乜投桃報李，有消息話福建幫數名骨幹人物，最近就係咪起旗派人參選進行可行性研究，千挑萬選後認為最理想人選係棄商從政、加入政府多年嘅民政事務局副局長許曉暉。

但有知情人士分析，呢個如意算盤未必打得響，因為一來呢個想法，分分鐘連許曉暉都未知情，其次要佢離開政府走入直選舞台並非容易，既要放棄喺政府每月十幾萬人工同福利，同時要瞓身做地區工作，淨係要佢減少時間陪兩個囡囡，相信係一個好艱難嘅決定。