政壇：經濟動力樁腳搗民宿
聲稱有多名地區樁腳嘅經濟動力，一直未見其影。等咗咁耐，佢哋有幾個樁腳尋日終於曝光。
首次打正旗號嘅有離島區議員鄺官穩同新界東地區主任劉帶生，仲有只稱為東區區議員嘅周潔冰，一齊到民政事務總署事務處。劉帶生話，有沙田第一城街坊投訴部分座數有單位租畀內地孕婦待產，仲好有系統，低層單位樓上畀人住、樓下就做食堂。不過，記者同佢一齊去到有關座數低層拍門，暫時證實唔到呢個狀況。
周潔冰亦話東區問題一樣嚴重，重災區喺北角、炮台山同維園附近嘅三無大廈，懷疑有人用板間房形式經營「民宿」，擔心影響安全。民政事務總署就回應話，會致力打擊無牌經營旅館活動，接到投訴會喺八個工作天內，按情況放蛇及突擊巡查等，農曆年更會聯同警方展開突擊執法行動。
周潔冰（左二）同劉帶生（右二）向民政事務總署人員遞信。