政壇：阮國恒爆傾人幣血淚史
香港離岸人民幣業務突飛猛進，由○九年開放人民幣跨境貿易結算試點開始，人民幣跨行轉帳、人民幣貸款等業務接踵而來，但原來當日金管局同人行、外匯局等內地監管機構商討框架時絕對係有血有淚。
事緣早於○八年八月，現任金管局副總裁Arthur阮國恒、Peter彭醒棠，同埋現任外事部主管尹子輝等一干人，北上內蒙海拉爾與人行磋商人民幣跨境貿易結算框架，連續兩日朝八晚十一開會，認認真真傾細節，當中又為最關注嘅「真實貿易背景要求」下定義。
Arthur話朝早七點食早餐，八點開始第一節會議，傾到中午就食飯，中間抖一抖，下午四點又開始第二節會議，晚飯完畢開最後一節到夜晚十一點先完。每日十五個鐘頭，咁傾法真係人都呆，傾到出現樽頸位時，一班官員都會到海拉爾浩瀚嘅大草原邊行邊傾，結果真係傾得掂喎！