政壇：扮嘢文有贏冇輸

海洋公園同香港迪士尼樂園既係競爭對手，亦可以話係歡喜冤家。點解咁講？事關迪士尼樂園行政總裁金民豪尋日出嚟公布業績，咁啱海洋公園搞三十五歲生日派對，主席「扮嘢文」盛智文以「壽星公」Look現身搶鏡，由於雙方嘅活動差唔多同時間進行，撞到咁應，話唔係打對台都冇人信。

迪士尼入場人次追貼

其實，類似嘅打對台情況已經唔係首次，但今次一開波，金民豪就報捷，話迪士尼上年度截至十月有五百九十四萬人次入場，完稅前盈利逾五億元，較海洋公園完稅前嘅盈利只有約三億元多，帳面數好清楚，然而扮嘢文就口硬唔認輸，話海洋公園嘅盈利佔收入比率，高過迪士尼一倍，跟住再下一城，話舊年錄得破紀錄嘅七百萬入場人次。

嘩！收入比率同入場人次都高過迪士尼，即係話海洋公園有贏冇輸喇！之不過，呢啲可能只係扮嘢文變魔術嘅掩眼法喎！

本來海洋公園嘅業績最初係以七月一日至六月三十日為財政年度，但喺迪士尼開幕後，就多咗一個計法，同迪士尼一樣財政年度由十月一日至九月三十日，點知扮嘢文尋日再爆多一個計法出嚟，財政年度係由二○一一年一月一日至十二月三十一日。換言之，加埋就有三個計法嘞！

點解扮嘢文要變咁多種計法出嚟？心水清嘅人都知迪士尼嘅入場人次追貼海洋公園，所以變計法就可以提早或延後幾個月計數。

總之邊種計法，計出嚟條數係多過對家就得嘞！就係咁，喺扮嘢文嘅魔術手施法下，難怪海洋公園入場人次節節上升，又點會輸呢。