無心無肺無靈魂 無德無能無運行

俗語話，一命二運三風水。有時唔到你唔信邪，新年流流，新政府總部居然淪為退伍軍人症惡菌溫床，「門常開」變成「病常來」，官員議員聞菌色變，人人自危，真係大吉利是！

新衙門入伙四個幾月，高官張櫈都未坐熱，就爆出咁大嘅醜聞，港府丟架事小，佗衰香港運氣事大吖。其實，堪輿學家早就預言，新政府總部中間穿窿，會遇上穿心煞，人處其中容易患病，如今果然不幸而言中。大家都知喇，香港回歸以來運程麻麻，亂象叢生，家陣連被視為政治心臟嘅政府總部亦自身難保，日後都幾難有運行。

本來呢，政府總部應該四平八穩，不求奢華，只求實用。點知煲呔曾政府好大喜功，標奇立異，將政府總部起到好似藝術館咁，不倫不類。講起真係眼冤，港府生人霸死地，霸佔咗添馬艦呢幅海景地王，仲大拿拿花費五十億元公帑，結果唔衰攞嚟衰，「門常開」無心無肺，添煩添亂。你話嘞，政府空心，官員無心，施政無靈魂，有乜法子唔凶多吉少，亂過亂世佳人吖，叮！

大家咪以為講風水係迷信，其實建築風水好有講究，好有科學根據o架。呢，正如著名國際建築大師貝聿銘話齋，建築師都應該相信風水，例如建屋要依山傍水，就係建築風水。「門常開」係就係依山傍水，依太平山傍維多利亞港，可惜大樓中間空空如也，好似空心老倌咁，點聚風水及正氣吖！

正所謂，非禮必喪風水，缺德必喪風水。煲呔曾政府無德無能，一味好大喜功，為咗打造呢項面子工程，指令工人日夜趕工，搞到甩甩漏漏，烏龍百出，連入伙都匆匆忙忙，滾水淥腳，唔撞板至奇喇。所以話，風水玄機，奧妙無窮，有時唔到你唔信o架。

話時話吖，夕陽政府時日無多，仲有半年就夠鐘收工，政府總部點樣惡菌纏身，點樣生人勿近，對呢班高官嚟講，影響已經唔係好大，大不了咪提早「退伍」。最大鑊嘅下屆政府，唔止要接手煲呔曾留低嘅爛攤子，仲要接手埋呢個無心無肺、藏污納垢嘅「門常開」，日子都唔知點過。即係咁，如果下任特首本身有能力、夠正氣，或者仲可以頂得住；但如果下任特首吊吊揈，又無能力，又無民望，咁就該煨咯，香港想唔車毀人亡都幾難！

講嚟講去，香港回歸之後時運不濟，兩個特首一蟹不如一蟹，北大人睇住港府醜態百出，任由香港自生自滅，鐵定心腸五十年不管，都唔知究竟回歸嚟做乜，叮！