政壇：趙式芝北海道滑雪勁free
早前GiGi趙式芝趁住假期同好友楊如芯去日本北海道滑雪，七日旅遊滑足五日，大叫過癮。GiGi話今次比上次好玩得多，又指今次去滑雪個雪山冇乜人，比以前少咗七成人，玩起上嚟特別過癮，好free，唔會畀人阻住。點解咁少人？佢話：「一嚟可能因為啲人驚有輻射，二嚟日圓真係好高，太貴，以前我哋去當地餐廳食飯，排隊排到夜晚十一點都未必食到，依家餐廳坐唔滿。」佢仲話北海道今次落咗四日狂風大雪，雖然對滑雪影響唔大，但揸車時就要特別小心，佢話：「太大雪，試過有一晚係落咗1.2米嘅雪，好誇張，第二日幫架車剷雪都剷到手軟，同埋揸車要好小心，試過停好綠燈，明明煞咗車都仲向前滑，好彩揸得慢冇事。」
趙式芝（右）聖誕假同好友楊如芯去北海道滑雪，七日旅遊滑足五日。